Maanta oo kale deegaanada Somaliland sanad waliba waxay udabaal dagaan maalinta ay sheegteen inay ka go’een Somaliya inteeda kale taasi oo munaasabad lagu maamuusayey arintaas lagu qabtay ilinka hore ee Madaxtooyada Somaliland oo ku taalla magaalada Hargeysa.
Xaflada oo ahayd mid agaasimka ay waqti badan geliyeen ayaa waxa ka qeyb galay mas’uuliyiinta ugu sareysa maamulka Somaliland sida Axmed Siilaanyo oo ah Madaxweynaha maamulkaasi,Suleymaan Maxamuud Adan oo ah Gudoomiyaha Golaha guurtida,C/raxmaan Maxamed Cabdullaahi gudoomiyaha golaha Wakiilada,Gudoomiyaha Maxkamada Sare ee Somaliland Dr Yuusuf Ismaaciil iyo Xubno kale.
Gaado ka ciyaar ciidamada iyo Ardayda Waxbarashada iyo qaar ka mid ah Ururada Bulshada ay Socod Ku mareen meesha Munaasabada ka dhaceysay ayaa waxa intaasi kadib khudbad dheer halkaasi ka jeediyey Madaxweynaha Maamulka Somaliland Axmed Maxamed Maxamuud Siilaanyo.
Waxa uu sheegay marka ugu horeysay Axmed Siilaanyo in dabaal deggan 22 sano kadib ay dhiig iyo juhdi badan usoo galeen hambalyana ujeediyey shacabka deegaanada Somaliland.
Waxa uu soo hadal qaaday arinta kusaabsan suurta galnimada mar kale inay Somaliya iyo Somaliland midoobaan isagoo sheegay in hore utijaabiyeen wixii ay gooni inay u istaagaan sababayna ay taagan tahay.
Khudbada Axmed Siilaanyo uu jeediyey Maanta waxa uu kaga hadlay dayaca iyo darxumada dhaqaale ee dadka Somaliland ku dhaqan ay ka cabanayaan sheegayna inay xukuumadiisa wax ka qaban doonto waqtiyada soo socda.
Waxa uu si maldahan uga hadlay arinta kusaabsan in beesha caalamka udiidan tahay aqoonsi ah inay ka madax banaanaadaan Somaliya hayeeshee ku celiyey mar kale in la tixgeliyo codsigooda ku aadan in la aqoonsado sida uu yiri.
WM.Muqdisho
